اسلام آباد (نیشنل ٹائمز)پاکستان شوبز انڈسٹری کے اسٹار شہریار منور نے اداکارہ سجل علی کے ساتھ اپنے بولڈ فوٹو شوٹ پر خاموشی توڑ دی۔فوٹو اینڈ ویڈیو شیئرنگ ایپ انسٹاگرام پر اداکار شہریار منور فیشن میگزین کے لیے کروائے گئے بولڈ شوٹ کے آخری حصے کی چند تصاویر شیئر کرتے ہوئے نقادوں کو آڑے ہاتھوں لیا اور فوٹو شوٹ کا سیاق و سباق سمجھا دیا۔اداکار نے تصویر کے کیپشن میں لکھا کہ ’اس بات کا خیال رکھیں کہ ہم مختلف کرداروں کو نبھانے والے اداکار ہیں، ہمارے کرداروں سے محظوظ ہوں، یہ ہی آرٹ ہے‘۔انہوں نے مزید کہا کہ اس گلیمرز شوٹ کا خیال امریکی مصنف آرتھر ملر اور اداکارہ مارلن منرو کے رومانوی تعلقات سے لے کر ہندوستانی ہدایت کار کمال امروہی اور اداکارہ مینا کماری کی محبت ، شادی اور پھر اختلافات جیسی حقیقی کہانیوں سے ماخوذ کیا گیا ہے۔اداکار شہریار منور نے ایک تصویر کا حوالہ دیتے ہوئے کہا کہ آرٹسٹ اپنے محبوب کا مجسمہ بنانے کی بجائے اپنا مجسمہ تراش رہا ہے جو اس کی خود پسندی کو ظاہر کر رہا ہے۔جسے ازدواجی رشتے میں بدسلوکی و زیادتی کے استعارے کے طور پر استعمال کیا گیا ہے۔انہوں نے کیپشن کے آخر میں لکھا کہ یہ ہی آرٹ ہے اس سے لطف اندوز ہوں۔واضح رہے کہ اداکار شہریار منور اور اداکارہ سجل علی کے اس بولڈ فوٹو شوٹ کو سوشل میڈیا صارفین کی جانب سے سخت تنقید کا نشانہ بنایا جارہا ہے۔