اسلام آباد (نیشنل ٹائمز)پاکستان کے سوشل میڈیا اسٹار ناصر خان جان نے اپنے بیٹے کی پہلی تصویر شیئر کردی۔مائیکرو بلاگنگ سائٹ ٹوئٹر پر ناصر خان جان نے اپنے نومولود بیٹے کی تصویر شیئر کی جس میں وہ سکون سے سو رہا ہے۔ناصر خان جان نے اپنے ٹوئٹ میں کہا کہ ’میرا ننھا شہزادہ‘۔سوشل میڈیا اسٹار نے یہ بھی کہا کہ بیٹے کی تصویر پر ’ماشاءاللّٰہ‘ ضرور بولیں۔واضح رہے کہ ناصر خان جان نے والد بننے کی خوشخبری اپنے مداحوں و فالوورز کے ساتھ ٹوئٹر پر شیئر کی تھی۔ٹوئٹ میں ناصر خان جان کو اپنے ہاتھ میں بیٹے کو تھامے دیکھا جا سکتا ہے جبکہ اس دوران پاس کھڑے بزرگ بچے کے کان میں اذان دے رہے تھے۔یاد رہے کہ مزاحیہ ویڈیوز اور مداحوں کو اپنے مخصوص اور منفرد انداز میں سالگرہ کی مبارکباد دینے کی وجہ سے ناصر خان جان کا شمار پاکستان کے سوشل میڈیا اسٹارز میں ہوتا ہے۔یہاں یہ بات بھی قابلِ ذکر ہے کہ دوسروں کی زندگی میں رنگ بھرنے والے ناصر خان جان سوشل میڈیا سیلیبریٹی سے زیادہ ایک مذاق تصور کیے جاتے ہیں۔ان کی ہر ویڈیو اور پوسٹ کے جواب میں لوگ انہیں برا بھلا کہتے ہیں،کچھ کمنٹس میں تو انہیں مرنے کا مشورہ دیا جاتا ہے اور متنازع بنادیا جاتا ہے۔