اسلام آباد (نیشنل ٹائمز)مصر میں بحیرہ احمر کے ساحل پر شارک کے قاتلانہ حملے سے دو غیر ملکی خواتین ہلاک ہو گئیں۔غیر ملکی خبر ایجنسی کے مطابق مصر کے وزیر ماحولیات کا کہنا ہے کہ شارک کی جانب سے خواتین پر حملے کے واقعات ہرغدہ شہر میں بحیرہ احمر کے ساحل پر پیش آئے۔ذرائع کا بتانا ہے کہ رومانیہ اور آسٹریا سے تعلق رکھنے والی سیاحوں کو شارک نے حملے کا نشانہ بنایا، دونوں حملے 600 میٹر کے فاصلے میں رونما ہوئے۔ وزیر ماحولیات کا کہنا ہے کہ متاثرہ علاقے میں تمام سیاحتی سرگرمیاں معطل کرنے کا حکم جاری کرتے ہوئے حملوں اور ان کے پیچھے کسی بھی سائنسی وجوہات کا جائزہ لینے کے لیے ایک کمیٹی تشکیل دی گئی ہے۔نجی اسپتال کے مطابق رومانیہ سے تعلق رکھنے والی خاتون کو اسپتال لایا گیا جہاں وہ زخموں کی تاب نہ لاتے ہوئے دم توڑ گئی جب کہ ہلاک ہونے والی دوسری خاتون کا آبائی تعلق آسٹریا سے ہے لیکن وہ اپنے شوہر کے ہمرہ گزشتہ پانچ سالوں سے مصر میں مقیم ہیں۔