اسلام آباد(نیشنل ٹائمز) جاپانی محققین نے کھانوں میں کم نمک کے استعمال کے خواہش مند افراد کے لیے الیکٹرک چوپ اِسٹِک تیار کرلی گئی ہے۔کھانوں میں زیادہ نمک کے استعمال سے ہائی بلڈ پریشر، فالج اور دیگر بیماریوں میں مبتلا ہونے کے امکانات بڑھ جاتے ہیں۔ ان بیماریوں سے بچنے کے لیے نمک کی مقدار کم کرنے کی ضرورت ہوتی ہے۔اسی بات کو مدنظر رکھتے ہوئے جاپان کی میجی یونیورسٹی کے پروفیسر ہومی میاشیتا (Homei Miyashita) نے مشروبات بنانے والی کمپنی کے اشتراک سے الیکٹرک چوپ اِسٹِک تیار کی ہے جو کھانوں میں نمکین ذائقہ بڑھا دیتی ہے۔پروفیسر ہومی میاشیتا کا کہنا ہے کہ اس میں منی کمپیوٹر استعمال کیا گیا ہے جو الیکٹرک چوپ اِسٹِک میں الیکٹریکل کرنٹ کی انتہائی کم مقدار پیدا کرتا ہے جس سے منہ میں نمکین ذائقے کا احساس پیدا ہوتا ہے۔ الیکٹرک چوپ اِسٹِک نمکین ذائقے کو ڈیڑھ گناہ تک بڑھا سکتی ہے۔پروفیسر ہومی میاشیتا اور ان کی لیبارٹری مختلف متبادل ذرائع سے کھانوں کے ذائقوں پر مختلف تحقیق کرتی رہتی ہے۔ انہوں نے اس سے قبل ایک ٹی وی اسکرین بھی تیار کیا ہے جسے چاٹنے سے کھانے کے مختلف ذائقوں کا احساس پیدا ہوتا ہے۔