نیو یارک سٹی (نیشنل ٹائمز) نیویارک سینٹرل پارک کے قریب نئی عمارت کی تعمیر مکمل ہوگئی ہے جو 1428 فٹ اونچی اور 84 منزلہ ہونے کے باوجود اتنی پتلی ہے کہ دور سے دیکھنے پر کسی بانس جیسی نظر آتی ہے۔ میڈیارپورٹس کے مطابق اس کی بنیاد کا رقبہ 400 مربع گز سے بھی کم ہے، یعنی اس عمارت کی اونچائی، اس کی چوڑائی سے 24 گنا زیادہ ہے۔اسٹینوے ٹاور کہلانے والی یہ عمارت جدید ترین تعمیراتی ٹیکنالوجی کا شاہکار ہے جس میں دستیاب جگہ کا غیرمعمولی انداز سے استعمال کیا گیا ہے۔فلک بوس ہونے کے باوجود، اسٹینوے ٹاور میں صرف60 رہائشیوں کی گنجائش ہے جنہیں یہاں 82 فٹ لمبے سوئمنگ پول، فٹنس سینٹر، خوبصورت ٹیرس اور پرائیویٹ ڈائننگ روم سمیت، زندگی کی درجنوں آسائشیں حاصل ہوں گی۔البتہ ان آسائشوں کی قیمت بھی بہت زیادہ ہے کیونکہ اسٹینوے ٹاور میں ایک کمرے والے اسٹوڈیو اپارٹمنٹ کی قیمت 77 لاکھ 50 ہزار ڈالرہے جبکہ پینٹ ہائوس صرف 6 کروڑ 60 لاکھ ڈالر میں برائے فروخت ہے۔