اسلام آباد (نیشنل ٹائمز)امریکی وزیر خارجہ انٹونی بلنکن نے بھارت میں انسانی حقوق کی خلاف ورزیوں کی نشاندہی کردی۔غیر ملکی خبر رساں ادارے کے مطابق واشنگٹن میں امریکا اور بھارت کے وزرائے خارجہ و دفاع کے درمیان ٹو پلس ٹو ڈائیلاگ ہوا، انٹونی بلنکن، لائیڈ آسٹن کی ایس جے شنکر راج ناتھ سنگھ کے ساتھ پریس بریفنگ ہوئی۔اس موقع پر انٹونی بلنکن نے کہا کہ امریکا بھارتی اہلکاروں کی انسانی حقوق کی بڑھتی خلاف ورزیوں کی نگرانی کررہا ہے، انسانی حقوق کی مشترکہ اقدار پر بھارتی شراکت داروں کے ساتھ رابطے میں ہیں۔غیر ملکی خبر ایجنسی کے مطابق بھارتی وزیر خارجہ و دفاع نے انسانی حقوق کے معاملے پر تبصرے سے گریز کیا۔خیال رہے کہ امریکی نمائندہ الہان عمر نے بھارت میں انسانی حقوق کی خلاف ورزیوں پر تنقید کی تھی۔الہان عمر نے مودی حکومت پر تنقید کرنے میں امریکی حکومت کی ہچکچاہٹ پر سوال اٹھایا تھا۔
