اسلام آباد(نیشنل ٹائمز)پاکستان پیپلزپارٹی کے رہنما آصف شفیق ستی کا شاہد خاقان عباسی کے انٹریوز پر ردعمل آگیا۔ ان کا کہنا تھا کہ اگر میموگیٹ اسکینڈل میں نوازشریف کا کالا کوٹ پہن کر عدالت جانا درست تھا تو اس اعتبار سے میاں صاحب کے خلاف عدالتی فیصلے بھی درست تھے۔ن لیگ کو چاہئیے کہ شاہد خاقان عباسی کو میموگیٹ اسکینڈل میں نوازشریف کے کالا کوٹ پہن کر جانے کو درست کہنے پر شوکاز نوٹس جاری کرے۔ ن لیگ میموگیٹ اسکینڈل میں نوازشریف کے پیش ہونے پر 10 سال سے معافیاں مانگ رہی ہے اور شاہدخاقان عباسی اس عمل کو درست کہہ رہے ہیں۔ شاہد خاقان عباسی نے پہلے ایک انٹرویو میں کہا تھا کہ مریم نواز کے بیانات کی کوئی حیثیت نہیں ہے۔ شاہدخاقان عباسی نے اب شہباز شریف کی مفاہمت کی پالیسی سے بھی اختلاف کا اظہار کردیا ہے۔ مسلم لیگ ن شاہد خاقان عباسی کے بیانات پر اپنی پالیسی واضح کرے یا انہیں شوکاز نوٹس جاری کرے۔ شاہد خاقان عباسی وضاحت کریں کہ دنیا کے 50 امیرترین افراد میں شامل وہ کون سا فرد ہے کہ جس نے میاں نواز شریف کو پیسے دئیے۔ شاہد خاقان عباسی نے دنیا کے امیرترین فرد کی جانب سے نواز شریف کو پیسے دینے کا بیان دے کر اپنے لیڈر کے حوالے سے مزید سوالات پیدا کردئیے ہیں۔