اسلام آ باد (نیشنل ٹائمز ) وفاقی وزیر خزانہ شوکت ترین کی زیر صدارت نیشنل پرائس مانیٹرنگ کمیٹی اورنیشنل پاور پارک منیجمنٹ کمپنی کی نجکاری کے حوالے سے اجلاسوں کا انعقاد کیا گیا ،وزیر خزانہ نے قیمتوں پر کنٹرول کیلئے متعلقہ اداروں کی کوششوں کی تعریف کی اور ہدایت کی کہ عام آدمی کو زیادہ سے زیادہ ریلیف یقینی بنانے کیلئے تمام ادارے مزید کام کریں،انہوں نے نجکاری کمیشن اور دیگر اسٹیک ہولڈرز کو مکمل تعاون کی یقین دہانی کرائی ۔منگل کو وزیر خزانہ شوکت ترین کی زیر صدارت نیشنل پرائس مانیٹرنگ کمیٹی کا اجلاس ہوا، اجلاس میں وفاقی وزراء ، مشیروں اور معاونین سمیت صوبائی چیف سیکرٹریز اور دیگر حکام نے شرکت کی، اجلاس کے دوران ملک میں ضروری اشیاء آٹا، گھی، چینی، چکن، انڈوں، دالوں اور سبزیوں کی قیمتوں کا جائزہ لیا گیا، سیکریٹری خزانہ نے نیشنل پرائس مانیٹرنگ کمیٹی کو مہنگائی کے رجحان پر بریفنگ دی ، انہوں نے بتایا کہ گذشتہ ہفتے مہنگائی کی شرح میں 0.63 فیصد کمی ریکارڈ کی گئی، اشیائے ضروریہ میں سے 10 کی قیمتوں میں کمی اور 29 میں استحکام رہا، وزیر خزانہ نے مہنگائی پر کنٹرول کے اقدامات پر صوبائی اور وفاقی حکام کی کوششوں کی تعریف کی، وزارت فوڈ سکیورٹی کو خوردنی تیل اور دالوں سمیت اشیائے ضروریہ کی پیداوار بڑھانے کے اقدامات کی ہدایت کی گئی، اجلاس میں وزارت صنعت و پیداوارنے چینی کی ایکس مل قیمت کے تعین میں پیش رفت پر بریفنگ دی، ادارہ شماریات نے اشیائے ضروریہ کی قیمتوں کے تجزیئے اور فرق پر بریفنگ دی ، اجلاس میں وزیر خزانہ کو مسابقتی کمیشن کی جانب سے پولٹری مارکیٹ کی صنعت کے بارے تحقیقات پر بریفنگ دی گئی، وزیر خزانہ نے قیمتوں پر کنٹرول کیلئے اداروں کی کوششوں کی تعریف کی اور ہدایت کی کہ عام آدمی کو زیادہ سے زیادہ ریلیف یقینی بنانے کیلئے تمام ادارے مزید کام کریں۔ دیریں اثناء وزیر خزانہ شوکت ترین کی زیر صدارت نیشنل پاور پارک منیجمنٹ کمپنی کی نجکاری سے متعلق اجلاس ہوا ، اجلاس میں وزیر نجکاری، وزیر توانائی، مشیر ادارہ جاتی اصلاحات اور معاون خصوصی پاور ڈویژنے شرکت کی، شرکاء نے وزیر خزانہ کو نجکاری سے متعلق اب تک کی پیش رفت سے آگاہ کیا ، وزیر خزانہ نے نجکاری کمیشن اور دیگر اسٹیک ہولڈرز کو مکمل تعاون کی یقین دہانی کرائی۔