اسلام آباد(نیشنل ٹائمز)قطر کے حکمران شاہی خاندان کے رکن و پاک قطر تکافل گروپ کے چیئرمین شیخ علی عبداللہ التھانی کی وزارتِ خارجہ میں وزیر خارجہ مخدوم شاہ محمود قریشی سے ملاقات۔دوران ملاقات دو طرفہ تعلقات ،تجارتی و اقتصادی تعاون سمیت باہمی دلچسپی کے امور پر تبادلہ ء خیال کیا گیا۔وزیر خارجہ نے شیخ علی عبداللہ التھانی کو وزارت خارجہ آمد پر خوش آمدید کہا۔پاکستان اور قطر کے مابین یکساں مذہبی اور ثقافتی اقدار کی بنیاد پر گہرے برادرانہ تعلقات استوار ہیں۔پاکستان، قطر کے ساتھ دو طرفہ تعلقات بالخصوص اقتصادی تعاون کے فروغ کا متمنی ہے۔ شیخ علی عبداللہ التھانی نے وزیر خارجہ کو پاک – قطر التکافل گروپ کا تعارف کراتے ہوئے، پاکستان میں جاری کاروباری سرگرمیوں کی تفصیلات سے آگاہ کیا ۔شیخ علی عبداللہ التھانی نے کہا کہ پاک قطر تکافل گروپ، پاکستان میں مزید سرمایہ کاری کیلئے پر عزم ہے۔ حکومت پاکستان، اپنی توجہ اقتصادی ترجیحات کی جانب مبذول کیے ہوئے ہے ۔پاکستان، 220 ملین آبادی پر مشتمل وسیع مارکیٹ ہے جہاں سرمایہ کاری کے وسیع مواقع موجود ہیں ۔ہم بیرونی سرمایہ کو پاکستان میں کاروبار کیلئے “ای ویزہ” سمیت بہت سی سہولیات فراہم کر رہے ہیں۔قطری کمپنیاں، پاکستان میں تعمیرات، انفارمیشن ٹیکنالوجی، انفراسٹرکچر ڈویلپمنٹ، بنکنگ اور سیاحت سمیت مختلف شعبوں میں سرمایہ کاری کر کے بہترین منافع کما سکتی ہیں۔وزیرخارجہ نے عزت مآب امیر قطر کیلئے نیک خواہشات کا اظہار کیا۔