اسلام آباد(نیشنل ٹائمز)دورہ عراق کے دوران وزیر خارجہ مخدوم شاہ محمود قریشی کی بغداد میں عراقی وزارت دفاع آمد۔ عراقی وزیر دفاع جمعہ عناد سعدون خطاب الجیبوری نے وزیر خارجہ کا خیر مقدم کیا ۔عراقی وزارتِ دفاع میں وزیر خارجہ مخدوم شاہ محمود قریشی کی عراقی وزیر دفاع جمعہ عناد سعدون خطاب الجیبوری سے ملاقات ہوئی۔ دوران ملاقات علاقائی سیکیورٹی کی صورت حال اور دو طرفہ دفاعی تعاون کے امور پر گفتگو کی گئی۔وزیر خارجہ نے کہا کہ پاکستان عراق کے ساتھ برادرانہ تعلقات کو بہت اہمیت دیتا ہے، پاکستان دہشت گردی کے خلاف جنگ میں عراقی عوام کی قربانیوں کو قدر کی نگاہ سے دیکھتا ہے۔یوم پاکستان پریڈ میں عراقی “پیراٹروپرز” کی شرکت ہمارے دو طرفہ مضبوط دفاعی تعلقات کا مظہر ہے۔ وزیر خارجہ نے عراقی وزیر دفاع کو پاکستان کی جانب سے ترقیاتی اور دفاعی شعبوں میں ہر ممکن معاونت و تعاون کی پیشکش کی ۔فریقین کا علاقائی سلامتی و استحکام کے لیے مل کر کام کرنے کے عزم کا اعادہ کیا گیا۔وزیر خارجہ نے عراقی وزارتِ دفاع میں رکھی “ویزیٹرز بک” میں اپنے تاثرات قلمبند کئے۔