اسلام آباد(نیشنل ٹائمز)آن لائن شکایت درج کروانے والی ایپ سٹیزن پورٹل نے کام کرنا چھوڑ دیاہے۔ سٹیزن پورٹل پر اندرون اور بیرون ممالک سے 30 لاکھ سے زائد لوگ رجسٹرڈ ہیں۔واضح رہے کہ وزیراعظم عمران خان نےگزشتہ روز پاکستان سٹیزن پورٹل پر ایک لاکھ 55 ہزار شکایات دوبارہ کھولنے کا حکم دیا تھا۔پاکستان سٹیزن پورٹل پرعوامی شکایات کے ازالےسے متعلق وزیراعظم عمران خان نے ایکشن لیتے ہوئے کہا کہ جولائی 2020 تا دسمبر2020 غیر مطمئن شہریوں کی شکایات دوبارہ کھولی جائیں۔وزیراعظم آفس نے بتایا کہ وزیراعظم کی ہدایات پر شکایات کو مرحلہ وار کھولا جائے گا۔وزیراعظم آفس کے مطابق شکایات پر نظرثانی کیلئے دوبارہ کھولی گئی شکایات اعلیٰ افسران کو تفویض کردی گئی ہیں جبکہ نظرثانی شکایات کیلئے متعلقہ شہری سے رابطہ اور مجاز افسر کی رائے لازمی قرار دی گئی ہے۔وزیراعظم آفس کا کہنا ہے کہ پہلے جائیداد کے تنازعات، امن وامان اور انسانی حقوق سے متعلق شکایات کو دوبارہ کھولا جائے گا جبکہ وفاقی اداروں کی 68 ہزار اور پنجاب کی 53 ہزار شکایات پر نظرثانی کی جائے گی۔