جوبا(شِنہوا) جنوبی سوڈان کی مشرقی استوائی ریاست کی کاؤنٹی بودی میں ہونیوالے ایک مہلک حملے میں کم از کم 14 افراد ہلاک اور 7 دیگر زخمی ہو گئے ہیں۔ریاست کے گورنر کے پریس سیکرٹری الیانڈرو لوٹوک نے پیر کے روز بتایا کہ نامعلوم مسلح افراد نے اتوار کے روز قبل از سحر تقریباً ایک بجے کیمپ میں سوئے ہوئے افراد پر حملہ کیا اور 12 خواتین اور 2 بچوں کو ہلاک کر دیا۔لوٹوک نے جوبا میں فون پر شِنہوا کو بتایا کہ ریاستی حکومت سخت ترین الفاظ میں اس واقعے کی مذمت کرتی ہے ۔ ہم اپنے شہریوں کو یقین دلانا چاہیں گے کہ ریاستی حکام حملے کی تحقیقات کریں گے۔انہوں نے مزید بتایا کہ مقامی حکام نے حملے کے پیچھے کے مقصد کے بارے میں ابھی اندازہ نہیں لگایا ہے، انہوں نے یہ بھی کہا کہ حملہ آوروں کی تلاش بڑے پیمانے پر جاری ہے۔