نئی دہلی (شِنہوا) بھارتی دارالحکومت میں نوول کرونا وائرس کے روزانہ کیسز میں اضافے کے پیش نظر دہلی حکومت نے لوگوں کی شادیوں کی تقریبات میں اکٹھا ہونے پر ایک بار پھر سخت پابندیاں عائد کردی ہیں۔دہلی ڈیزاسٹر مینجمنٹ اتھارٹی کے جاری کردہ ایک حکم نامے کے مطابق کھلی جگہوں پر منعقدہ شادیوں میں 200 سے زائد مہمانوں کی شرکت کی اجازت نہیں ہوگی جبکہ بند شادی ہالوں میں 100 سے زیادہ مہمانوں کو جانے کی اجازت نہیں ہوگی۔ملک میں نوول کرونا وائرس سے سب سے زیادہ متاثرہ مقامات میں سے ایک قومی دارالحکومت دہلی میں ہفتہ کے روز1ہزار558 نئے کیسز اور 10 اموات ہوئیں۔کچھ ہفتوں پہلے تک دہلی میں نوول کرونا وائرس کے روزانہ کیسز کی تعداد 100 سے نیچے آچکی تھی۔دہلی کے محکمہ صحت نے تصدیق کی ہے کہ نوول کرونا وائرس کے باعث قومی دارالحکومت میں اب تک 10ہزار997 افراد ہلاک ہوچکے ہیں۔گزشتہ ہفتے دہلی کے وزیر اعلی اروند کیجریوال نے وزارت صحت کے اعلی عہدیداروں کے ساتھ نوول کرونا وائرس کی صورتحال کا جائزہ لیا اور قومی دارالحکومت میں عالمی وباء کے بڑھتے ہوئے گراف کی جانچ پڑتال کے لئے جنگی بنیادوں پر ویکسی نیشن مہم چلانے پر زور دیا۔