اسلام آباد (نیوز ڈیسک)برطانوی عدالت کی جانب سے جونی ڈیپ کو اپیل کا حق نہ دینے سے متعلق اپنا بیان جاری کرنے کے بعد امریکی اداکارہ امبر ہرڈ نے انسٹاگرام پر کمنٹس کا آپشن بند کردیا۔رپورٹس کے مطابق جونی ڈیپ اور امبر ہرڈ کے درمیان قانونی جنگ کو لے کر اداکار کے مداحوں کو سوشل میڈیا پر بدتمیزی والے ٹرینڈز چلانے کے طور پر جانا جاتا ہے۔ اسی وجہ سے امبر ہرڈ نے کمنٹس کا آپشن بند کیا۔برطانیہ کی ایک عدالت نے جمعرات کو جونی ڈیپ کو اس فیصلے کے خلاف اپیل کرنے کا حق دینے سے انکار کر دیا تھا کہ وہ بیوی پر تشدد کرنے والے ہیں۔گزشتہ سال ہالی ووڈ اداکار جونی ڈیپ پر سابقہ اہلیہ امبر ہرڈ کو تشدد کا نشانہ بنانے کا الزام ثابت ہو گیا تھا۔واضح رہے جونی ڈیپ اور امبر ہرڈ نے 2015 میں شادی کی تھی اور دونوں کی عمر میں 23 سال کا فرق ہے۔ امبر ہرڈ نے 2016 میں ہی شوہر پر گھریلو تشدد کا الزام لگا کر ان سے علیحدگی اختیار کرلی تھی اور دونوں میں 2017 کے وسط تک طلاق ہوگئی تھی۔