اسلام آباد(نیوز ڈیسک)امریکی کمپنی ’بیٹر اپ‘ میں چیف امپیکٹ آفیسر کے عہدے پر نوکری کرنے والے شہزادہ ہیری کی تنخواہ کے بارے میں برطانوی میڈیا نے بتادیا۔برطانوی خبررساں ادارے کے مطابق شہزادہ ہیری کی تنخواہ سات ہندسوں پر مشتمل ہوگی یعنی ممکنہ طور پر ہیری کی تنخواہ ایک ملین ڈالر سے زیادہ ہوگی۔شہزادہ ہیری کو تنخواہ کے ساتھ سالانہ پانچ روزہ ’انر ورک‘ کی پیشکش بھی کی گئی ہے۔ ’انر ورک‘ پیکج ’بیٹراپ‘ کے تمام ملازمین کو ان کی ذاتی ترقی کے لیے مہیا کیا جاتا ہے۔واضح رہے کہ شاہی حیثیت سے دستبردار ہونے والے 34 سالہ شہزادہ ہیری کو نئی ملازمت مل گئی۔ ہیری کو کیلیفورنیا میں ایک ٹیک کمپنی نے ملازمت دی ہے جوکہ ملازمین کی تربیت اور دماغی سکون سے متعلق اپنی خدمات سرانجام دیتی ہے، ہیری اپنی اس نئی ملازمت کا آغاز کرنے کے لیے بہت پُرجوش ہیں۔ڈیک آف سسیکس کی تقرری ٹیک کمپنی ’بیٹراپ‘ میں بطور چیف امپیکٹ آفیسر کی گئی ہے۔ کمپنی کی طرف سے جا ری کئے گئے بیان میں ہیری نے کہا کہ وہ کمپنی کے لیے اپنا کردار ادا کرنے کے لیے پُرجوش ہیں جبکہ کمپنی کے پہلے چیف امپیکٹ آفیسر ہونے کی حیثیت سے ان کا مقصد ذہنی سکون سے متعلق تجزیے، مددگار اور ہمدرد برادری کی تشکیل اور ایسے ماحول کو ترجیح دینا ہے جہاں ایمانداری سے حساس مضوعات پر گفتگو ہوسکے۔ہیری نے یہ بھی کہا کہ ان کی توجہ ذہنی سکون سے متعلق معلومات فراہم کرنے اور ادارے کے سماجی مقصد میں رہنمائی اور اسے عالمی برادری تک پھیلانے پر ہوگی۔ہیری نے مزید کہا کہ خود پسندی کا مطلب کسی بھی ٹوٹی ہوئی چیز کو جوڑنا نہیں ہے بلکہ ہمیں بہترین بنانا ہےکہ زندگی کہیں بھی لے جا کر پھینکتی ہے تو جو انسان کسی بھی قسم کے چیلینج کے لیے تیار ہوتا ہے وہ ہمت اور اعتماد کے ساتھ تمام مشکلات کا سامنا کرلیتا ہے۔ یہی وہ سفر ہے جسے ’بیٹراپ‘ ممکن بنا رہا ہے اور وہ اس سفر میں ادارے کے ساتھ رہنے کے لیے پُرامید ہیں۔ادارے کی ویب سائٹ نے ہیری کو ایک دفاعی تجربہ کار، انسان دوست اور ماحول شناس کے طور پر متعارف کروایا ہے۔یاد رہے کہ جنوری 2020 میں شاہی خاندان کے سینیئر ارکان کی حیثیت سے دستبردار ہونے اورمالی خودمختاری کیلئے اپنے ارادوں کا اعلان کرنے والی اس جوڑی نے رواں سال 9 مارچ کو شاہی خاندان سے باضابطہ طور پر علیحدگی کا اعلان کیا تھا جس کے بعد انہیں آمدنی کا کوئی مناسب ذریعہ درکار تھا۔