لاہو(نیوز ڈیسک) لاہور ہائی کورٹ نے پاکستان مسلم لیگ ن کی نائب صدر مریم نواز کی عبوری ضمانت 12 اپریل تک منظور کر لی ۔خیال رہے کہ مریم نواز نے نیب نوٹس اور ممکنہ گرفتاری کے خلاف عبوری ضمانت کی درخواست دائر کی تھی ، جسٹس سردار محمد سرفراز ڈوگر کی سربراہی میں دو رکنی بنچ نے درخواست پر سماعت کی ۔مریم نواز اپنے وکلاء کے ہمراہ عدالت میں پیش ہوئیں ، درخواست میں موقف اپنا گیا کہ نیب نے 15 سو کنال اراضی سے متعلق انکوائری شروع کر رکھی ہے ، انکوائری میں شامل تفتیش ہونا چاہتی ہوں مگر گرفتاری کا خدشہ ہے ۔ اس لیے عدالت سے استدعا ہے کہ وہ میری عبوری ضمانت منظور کرے ۔مریم نواز نے کہا کہ حکومت کے دباؤ پر نیب مجھے گرفتار کرنا چاہتی ہے ، نیب حکومت کے اشارے پر سیاسی مخالفین کو ٹارگٹ کر رہا ہے ۔لیگی رہنما کی طرف سے قانون دان اعظم نذیر تارڑ اور امجد پرویز ایڈووکیٹ پیش ہوئے ۔ مریم نواز کے ساتھ رانا ثناءاللہ اور دیگر رہنما بھی پیش ہوئے ۔واضح رہے کہ نیب نے دو انکوائریز میں 26 مارچ کو مریم نواز کو طلب کیا ہے ۔