اسلام آباد(نیشنل ٹائمز)مقبوضہ کشمیر کے علاقے حیدر پورہ میں شہید ہونے والے 4 میں سے 2 افراد الطاف بھٹ اور مدثر گل کے اہلِ خانہ نے رات گئے تدفین کر دی۔شہداء کی میتیں بھارتی قابض انتظامیہ نے رات 1 بجے اہلِ خانہ کے حوالے کی تھیں، جس کے فوری بعد اہلِ خانہ کی جانب سے ان کی تدفین کر دی گئی۔شہداء کی تدفین کے وقت ان کے گھروں اور قبرستان کے گرد بھارتی پولیس کی بڑی تعداد موجود تھی۔قابض انتظامیہ نے گزشتہ روز ہندواڑہ قبرستان میں قبر کشائی کر کے میتوں کو اہلِ خانہ کے حوالے کیا تھا۔شہدا ءکی نمازِ جنازہ میں صرف چند لوگوں کو ہی شرکت کی اجازت دی گئی تھی۔واضح رہے کہ بھارتی قابض فوج نےجمعرات کی شام حیدر پورہ میں جعلی مقابلے میں 4 کشمیریوں کو شہید کر دیا تھا۔مقبوضہ کشمیر کے علاقے حیدر پورہ میں 4 کشمیریوں کی شہادت پر آج مکمل ہڑتال کی جا رہی ہے۔