اسلام آباد(نیشنل ٹائمز) پاکستان شوبز انڈسٹری کی نامور شوبز شخصات نے پاکستان کرکٹ ٹیم کی ٹی 20ورلڈکپ 2021 میں شاندار کارکردگی دکھانے پر خوشی کا اظہار کیا ہے۔پاکستانی گلوکار علی ظفر نے مائیکرو بلاگنگ ویب سائٹ ٹوئٹر پر پاکستان کی ٹی 20ورلڈکپ میں شاندار کارکردگی پر کھلاڑیوں کی تعریف کرتے ہوئے لکھا ہے کہ ’انہیں اپنی ٹیم پر فخر ہے‘۔انہوں نے لکھا کہ ’کرکٹرز واپسی پر شاندار استقبال کے حقدار ہیں‘۔انہوں نے کھلاڑیوں کی تعریف کرتے ہوئے لکھا کہ’ وہ جس پیشہ ورانہ مہارت اور جذبے کے ساتھ کھیلے اس سے اندازہ ہوتا ہے کہ مستقبل میں پاکستان کرکٹ کے لیے کیا آنے والا ہے‘۔گلوکار نے آسٹریلوی ٹیم کی تعریف کرتے ہوئے لکھا کہ’یہ بھی کہنا ضروری ہے، آسٹریلیا دیا گیا ہدف حاصل کرنے کے لیے جیسے نبرد آزما ہواوہ زبردست تھا!‘گلوکار عاصم اظہر نے پاکستان کرکٹ ٹیم کی تعریف کرتے ہوئے لکھا کہ’ جس طرح سے کھلاڑیوں نے یہ ورلڈ کپ کھیلا، اس پر انہیں بہت فخر ہے‘۔انہوں نے مزید لکھا کہ’ کیا ٹیم ہے، کیا سفر ہے۔ بس یہ دن ہمارا نہیں تھا‘۔عاصم اظہر نے لکھا کہ ’کرکٹرز آپ کی محبت اور حمایت کے مستحق ہیں، یہ پاکستان کرکٹ کا نیا دور ہے‘۔اداکارہ عرواحسین نے پاکستانی ٹیم کی اچھی کارکردگی کی تعریف کرتے ہوئے لکھا کہ ’پاکستان نے اچھا کھیلا‘۔اداکار عثمان خالد بٹ نےمداحوں سے مخاطب ہوتے ہوئے لکھا کہ ’ آپ کو ناقابل یقین حد تک فخر ہونا چاہیے‘۔انہوں نے اپنے ٹوئٹ میں لکھا کہ پاکستانی کرکٹ ٹیم نے دل جیت لیا۔اداکار ہمایوں سعید نے اپنے ٹوئٹ میں لکھا کہ ’پورے ٹورنامنٹ میں شاندار کارکردگی پر ٹیم پاکستان پر فخر ہے۔‘انہوں نے مزید لکھا کہ’جیت اور ہار کھیل کا حصہ ہیں؛ اہم بات یہ ہے کہ لڑکے کس لگن اور جذبے کے ساتھ کھیلے‘۔جبکہ اداکار عدنان صدیقی نے اپنے ٹوئٹ میں لکھا کہ’ ہمارے لڑکوں نے مشہور ’ناقابل تسخیر‘ ٹیم کے خلاف ہائی پریشر میچ میں اپنے اعصاب پر قابو رکھا‘۔ انہوں نے لکھا کہ ’اگر ٹی 20 نہیں تو آپ لوگوں نے ہمارے دل جیت لیےہیں!‘اس کے علاوہ گلوکارہ مومنہ مستحسن نے سیمی فائنل جیتنے پر آسٹریلیا کو مبارکباد دیتے ہوئے لکھا کہ ’بابر اعظم کی لیڈرشپ میں ٹورنامنٹ میں اچھی کارکردگی دکھانے پر ٹیم کی تعریف اور حوصلہ افزائی کریں‘۔انہوں نے اچھی کارکردگی دکھانے پر کھلاڑیوں کا شکریہ ادا کیا۔