لندن(نیشنل ٹائمز)وزیر خارجہ مخدوم شاہ محمود قریشی برطانیہ کے تین روزہ دورے پر لندن پہنچ گئے ہیں۔تفصیلات کے مطابق وزیر خارجہ مخدوم شاہ محمود قریشی کے ہیتھرو ایئرپورٹ پہنچنے پر برطانیہ میں پاکستان کے ہائی کمشنر معظم احمد خان، نائب سفیر ڈاکٹر فیصل عزیز اور سفارتخانے کے سینئر افسران نے ان کا خیر مقدم کیا۔ذرائع کے مطابق وزیر خارجہ آج رات پاکستان ہاؤس میں منعقدہ عشائیے میں شرکت کریں گے اور پاکستانی کمیونٹی کی نمائندہ شخصیات سے ملاقات کریں گے۔اس کے علاوہ شاہ محمود قریشی برطانوی فارن افیرز کمیٹی کے سربراہ، برطانوی وزیر خارجہ الزبتھ ٹورس اور ممبران پارلیمنٹ سے بھی ملاقات کریں گے۔اس ملاقات میں دو طرفہ تعلقات، کثیرالجہتی شعبہ جات میں دو طرفہ تعاون اور اہم علاقائی و عالمی امور پر تبادلہ خیال کیا جائے گا۔خیال رہے کہ وزیر خارجہ شاہ محمود قریشی لندن میں میڈیا نمائندگان سے گفتگو کریں گے اور پاک برطانیہ تعلقات، اہم علاقائی و عالمی امور پر پاکستان کے نقطہ نظر سے آگاہ کریں گے۔واضح رہے کہ وزیر خارجہ مخدوم شاہ محمود قریشی کا یہ دورہ برطانیہ دونوں ممالک کے مابین اعلیٰ سطحی روابط کے فروغ کا مظہر ہے۔