کے پی ایل کی وجہ سے کشمیر میں کھیلوں کو فروغ ملے گا: جہانگیر خان۔
پاکستان کے لیجنڈ اسکواش پلیئر اور کشمیر پریمیئر لیگ کی ٹیم مظفرآباد ٹائیگرز کے برانڈ ایمبیسیڈر جہانگیر خان کا کہنا ہے کہ کھیل محبت دوستی اور امن کا پیغام دیتے ہیں، کھیل اور سیاست الگ الگ چیزیں ہیں اور یہی دنیا کو کشمیر پریمیئر لیگ کا پیغام ہے۔
اسکواش کے سابق عالمی چیمپئن جہانگیر خان نےمیڈیا سے گفتگو کرتے ہوئے کہا کہ کے پی ایل میں مظفر آباد ٹائیگرز کا برانڈ ایمبیسیڈر بننے پر خوش ہوں، کے پی ایل کی وجہ سے کشمیر میں کھیلوں کو فروغ ملے گا۔
جہانگیر خان کا کہنا تھا کہ کھیل محبت، دوستی اور امن کا پیغام دیتے ہیں اور میرا بھی ہمیشہ یہی پیغام ہوتا ہے۔
انہوں نے کہا کہ ہر ملک میں کھیلوں کے اپنے فینز ہوتے ہیں، میرے فینز بھارت میں بھی ہیں اور ان کے لوگ کسی اور ملک کے کھلاڑی کے فین ہوں گے، اسے اسی نظر سے دیکھنا چاہیے۔
یہ بھی پڑھیں
کشمیری ٹیلنٹ سامنے آنے سے پاکستان کو فائدہ ہو گا: فاسٹ بولر عمران خان
ہرشل گبز کے پی ایل کا حصہ بننے کیلئے آزاد کشمیر پہنچ گئے
ہرشل گبز کے بعد مونٹی پنیسر نے بھی بھارت کا مکروہ چہرہ بے نقاب کر دیا
سابق عالمی چیمپئن کا کہنا تھا کہ ہمیں کھیل کو پروموٹ کرنا ہے، حریف صرف گراؤنڈ میں ہوتے ہیں، باہر سب دوست ہوتے ہیں، یہی چیز کھیل ہمیں سکھاتے ہیں، ہمیں یہ پیغام دینا ہے کہ کھیل اور سیاست الگ الگ ہیں۔
جہانگیر خان نے کہا کہ کشمیر میں کرکٹ کی سرگرمیاں تو ابھی شروعات ہیں، مزید کام کرنا ہے اور کام کرتے رہنا ہے، کے پی ایل پہلا پلیٹ فارم ہے۔
برانڈ ایمبیسیڈر مظفرآباد ٹائیگرز نے کہا کہ کشمیر میں بہت ٹیلنٹ ہے، کرکٹ، ایتھلیٹکس، ہاکی، اسکواش اور فٹبال میں ٹیلنٹ ہے، ہمیں اس سے فائدہ اٹھانا چاہیے اور اس کے لیے ٹیلنٹ کو سہولیات دینا ہوں گی۔