کرکٹ کو لاس اینجلس اولمپکس 2028ء میں شامل کرنے کی بولی دینے کے لیے ورکنگ کمیٹی بنا دی گئی : چئیرمین گریک بارکلے
لاہور (نیوز ڈیسک) انٹرنیشنل کرکٹ کونسل (آئی سی سی) نے لاس اینجلس اولمپکس 2028ء میں کرکٹ کو شامل کرانے کی کوششیں تیز کردیں۔ کرکٹ کو اولمپکس میں شامل کرنے کی بولی دینے کے لیے ورکنگ کمیٹی بنا دی گئی ہے، آئی سی سی کے مطابق اولمپکس 2028ء میں کرکٹ شامل کرنے سے امریکا میں موجود کرکٹ فینز کو بھی اطمینان ہوگا، کرکٹ کو 2022ء کے کامن ویلتھ گیمز میں پہلے ہی شامل کیا گیا ہے۔
آئی سی سی کے مطابق کرکٹ اب تک صرف ایک بار 1900ء میں پیرس اولمپکس میں شامل کی گئی تھی، کرکٹ کو اولمپکس میں شامل کرنے سے گیمز کو فائدہ ہوگا۔ آئی سی سی چئیرمین گریک بارکلے نے کہا کہ ہمیں یقین ہے کہ اولمپکس میں کرکٹ ایک اچھا اضافہ ہوگا، پوری کوشش ہے کہ 2028ء کے گیمز میں کرکٹ کو اولمپکس کا حصہ بنایا جائے اور اس کے بعد برسبین اولمپکس 2032ء اور اس کے بعد آنے والے مقابلوں میں بھی کرکٹ اولمپکس کا حصہ ہو۔