پشاور(نیشنل ٹائمز)عوامی نیشنل پارٹی کے سربراہ اسفندیارولی خان نے خبردار کیا ہے کہ سیکیورٹی گارڈز واپس لیے جانے پر اگر کسی رہنما کو نقصان پہنچا تو مقدمہ وزیر اعلی اور آئی جی کے خلاف درج کرائیں گے، صوبہ خیبرپختونخوا کی حکومت کی جانب سے 29سیاسی رہنمائوں اور اہم شخصیات سے پولیس سیکیورٹی واپس لیے جانے کے فیصلے پر ردعمل کا اظہار کرتے ہوئے اسفندریارلی خان نے کہا ہے کہ ایسے حالات میں سیکیورٹی واپس لی جا رہی ہے کہ جب خطرات مزید بڑھ گئے ہیں، انہوں نے الزام عائد کیا کہ موجودہ حالات میں سیکیورٹی کا واپس لینا دراصل ہمیں موقف سے پیچھے ہٹنے کا پیغام دینا ہے،اے این پی سربراہ نے کہا کہ ہمیں کسی بھی دھمکی یا پیغام سے ڈرایا نہیں جا سکتا ہے۔ انہوں نے کہا کہ دہشت گردی کے خلاف واضح موقف کی وجہ سے ہمیں ہی نشانہ بنایا جا رہا ہے، واضح رہے کہ صوبائی حکومت کی جانب سے جاری کردہ اعلامیے کے مطابق 29سیاسی رہنمائوں اور اہم شخصیات سے پولیس سیکیورٹی واپس لے کرایلیٹ فورس کے 58اہلکاروں کو ہیڈ کوارٹر طلب کرلیا گیا ہے۔