اسلام آباد(نیوز ڈییسک )کورونا وائرس سے بچاؤ کی ویکسین 60 سال سے زائد عمر کے بزرگ افراد کو آج سے لگائی جائے گی۔محکمہ صحت کے مطابق سائنو فارم ویکسین60 سال سے زائد عمر کے افراد کو لگائی جارہی ہے۔اس سے قبل ڈرگ ریگولیٹری اتھارٹی (ڈریپ) نے چینی ویکسین سائنو فارم 60 سال سے زائد عمر کے افراد کو لگانے کی اجازت دی تھی، ڈریپ کے رجسٹریشن بورڈ نے اجازت اپنے 301ویں اجلاس میں دی تھی۔ڈریپ نے روسی ویکسین اسپوٹنک کو بھی 60 سال سے زائد عمر والے افراد کو لگانے کی اجازت دی تھی۔ڈریپ حکام کا کہنا تھا کہ یہ فیصلہ 6 رکنی ایکسپرٹ کمیٹی کی سفارشات پر کیا گیا۔حکام نے بتایا کہ چینی اور روسی ویکسین لگانے کا فیصلہ چین، بحرین اور امارات کے ڈیٹا کی بنیاد پر کیا گیا۔ڈریپ حکام نے آگاہ کیا تھا کہ ویکسین لگنے کے بعد بوڑھے افراد کو دو دن تک مانیٹر کیا جائےگا، جبکہ ویکسین لگنے کے بعد بھی ماسک سمیت تمام احتیاطیں برتیں۔