اسلام آباد(نیشنل ٹائمز)وزارت خارجہ میں کوک سٹوڈیو کے اشتراک سے ’لہر سے آگےسرحدوں سے ماورا‘ کے عنوان سے’کافی ٹیبل بُک‘ بُک لانچ کی تقریب منعقد ہوئی۔ وزیرخارجہ مخدوم شاہ محمود قریشی کے پبلک ڈپلومیسی اقدام کے تحت پاکستان کے ثقافتی پہلو وںکو اجاگر کرنے کے مقصد سے ہونے والی یہ تقریب وزارت خارجہ میں منعقد ہوئی جس میں سفارتی برادری، وزرا، اراکین پارلیمان اورمختلف شعبہ ہائے زندگی سے تعلق رکھنے والی اعلی شخصیات کی بڑی تعداد نے شرکت کی۔ تقریب میں کوک سٹوڈیو کی تاریخ اور اس کے اثرات پرتعارف پیش کیاگیا اور ماہرانہ مذاکرہ بھی منعقد ہوا۔ کوک سٹودیو کے پروڈیوسر ذوالفقار جبار خان اور صحافی فیفی ہارون نے شرکاءکو پریزنٹیشن دی جبکہ نامور قوالوں فرید ایاز اور ابو محمد نے قوالی پیش کرکے تقریب میں سماں باندھ دیا۔وزیر خارجہ مخدوم شاہ محمود قریشی نے اس موقع پر خطاب میں کہاکہ ثقافتی ڈپلومیسی عالمی بیانیوں اور تصورات پر گہرا اثر ڈالتی ہے، اس کی اہمیت سے صرف نظر ممکن نہیں۔ انہوں نے کہاکہ پاکستان کا حقیقی چہرہ اور تشخص دنیا کے سامنے لانے کے لئے وزارت خارجہ اورکوک سٹوڈیو نے اشتراک کیا ہے۔ اس کا مقصد پاکستان کے اخوت واتحاد اور اس کی حقیقی صلاحیت کو دنیا کے سامنے پیش کرنا ہے۔ کوکا کولا ایکسپورٹ کارپوریشن کے پاکستان اور افغانستان ریجن کے جنرل مینیجر اور نائب صدر فہد اشرف نے تقریب سے خطاب کرتے ہوئے کہاکہ کوک سٹوڈیو کا مقصد پاکستان کے خوبصورت ورثے، ثقافت، تنوع اور صلاحیت کو دنیا میں متعارف کرانا ہے۔ وزارت خارجہ سے اشتراک عمل پاکستان کی حقیقی روح اور تشخص وکردار کو اجاگر کرنے کے مقصد سے ہم آہنگ ہے۔ وزارت خارجہ کا کوک سٹوڈیو سے اشتراک کا یہ اقدام ’وژن فارن آفس‘ کے ’تھاٹ لیڈرشپ پلیٹ فارم کے تحت کیاگیا ہے۔